1: Sax month come Mairtinmas, I fee’d in Turra Toun,
They said I wis the smairtest chiel in aa the country roun.
Wi a ring dum day, a ring dum a day,
Ring dum diddle come a dandy O.

2: Aul Willie feeʼd me, Robbie never spoke,
Tae come an caw the second pair at the Hash o Benagoak.

3: Wir foremanʼs like a constable, he niver faas asleep,
Up an doun the lang rigs, he niver slacks a theat.

4: The second billie, thatʼs masel, I caw a pair o brouns,
Ragnails on the foremanʼs heels, I fairly keep ma rouns.

5: The third, he comes fae Foggieloan and heʼs a pinted chiel,
His horse and his harness are aye lookin weel.

6: We hae a gallant kitchie lass, her name is Bessy Broon,
But, fegs, ʼTwad take a saidle girth her middle tae ging roun.

7: Sharnie Taes, the bailie, heʼs a sturdy chiel,
Aroun about the kittlie neuks he gars the barra reel.

8: Syne we hiv an orra lad, he seldom caws the ploo,
Thereʼs aye plenty orra work and files some neeps tae pu.

9: Syne we hiv a missie, sheʼs perjink an neat,
Faith! She keeps the kitchie billies unco scant o meat.

10: Willie rises in the mornin, gies the door a crash,
Oot aneth his pickie-say, “I think weʼll hae a thrash.”

11: Syne he has a brither, heʼs vrang amon the feet,
Tae see him k-nypin roun the close, ’twould nearly gar ye greet.

12: Come aa ye jolly horsemen, yeʼll gyang tae the ploo,
The orra lad tae caw the neeps an Sharnie fill and pu.

13: The author o this canty lay if ye wint it tae be known,
Spier ye at the herrin boats at the pier o Foggyloan.
Wi a ring dum day, a ring dum a day,
Ring dum diddle come a dandy O.