1: I thocht until masel ae day I'd like tae see a race,
For mony ither lads like me hae been tae sic a place;
So up I got, I washed masel, put on ma Sunday braws,
And wi a stick intae ma hand I started for the Shaws.

2: Ma mother strictly coonseled me before that I gaed out,
She says I wis tae mind ma een and what I wis aboot;
And mindin no be trod, ma son, beneath the horses' paws,
An mind ma lad, the savin’s true: ‘There's queer folk in the Shaws’.

3: The races pleased me unco weel, were fairly grand tae see,
The horses gaed sae awfu fast, I thocht they maist did flee;
When they came tae the winnin post, O siccan he loud huzzas,
Ye wid hae thocht they'd aa be gaen the queer folk in the Shaws.

4: A lassie then cam up to me an askit for a gill,
Says I, "If that's the fashion here I mauna tak it ill."
She wiles me o’er intill a tent an half a mutchin caas,
Says I, “I think ma mother’s right, there's queer folk in the Shaws."

5: The whisky made my love to bleeze I fand in perfect bliss,
And syne I taen her roond the waist tae tak a wee bit kiss;
When in a crack she lifts her neive, she gied it tae me in the jaws,
Says I, "My dear what means aa this, there's queer folk in the Shaws."

6: A strapin chiel came farrart an he took awa ma lass,
Miscaad me for a country loon, a stupid silly ass;
Said I, "If I've done any hairm jist tell tae me the cause.”
He made his fit spin aff ma hip, there's queer folk in the Shaws.

7: Aroused at last I raised ma fist an gied it tae him on the lug,
Though sairly wis I worried for't by his big collie dog;
It bit my airms, it bit my airse, it tore ma Sunday braws,
An in the row I lost my watch wi the queer folk in the Shaws.

8: The polis then when they cam in, they hauled me aff tae quad,
They put the twines aboot my wrists an thumped me on the road;
I had tae pay ma good pound note e'er I got oot o their claws,
Catch me again when I'm teen in by the queer folk in the Shaws.