1: O once I thocht the daybreak sun wis brichter that the e’en,
As it roused the glen and shook the earth and nestled every gean,
But it faded in the warmth o the brichtest sight I've seen,
The bonnie, bonnie lassie o the mornin.

And the sparkle o her laughter ever after I'll recaa,
Like the trinklin, linkin, jinklin as the mountain burnies faa;
But the hills are empty noo, the bonnie lassie is awa,
My bonnie, bonnie lassie o the mornin.

2: The mornin breathed oot cool as mile for mile we baith gaed on,
Reachin for yon high, high lands wi secret nooks and loans;
Whaur the rock was worn and weathered by the freens we'd never known,
Together wi the lassie o the mornin.

O’er the clouds and through the sun we scrambled tae the cairn above,
While the raven soared alow us and the secret words we'd have,
And the hills threw oot their airms, gaithered us intae their love.
My love for the lassie o the mornin.

3: When doun the scree wi skipped, trundlin happy on the heel,
We’d faa and lauch and see oorsels as bairns aince mair we’d feel,
And we baith knew we’d grasped the joy that nane could share nor steal,
As I held the bonnie lassie o the mornin.

In a dyke across the burn we built, we tried tae stop its race,
But we micht as weel hae tried tae haud oor wild love in one place;
Then I saw the look o partin soon tae come cloud ower her face,
O ma Margaret, bonnie lassie o the mornin.

4: Then weary wi one last daft run we jostled tae the inn,
Trippin, grippin, slippin, seein wha’d be left ahin,
Then a gratefu gasp o ale an thankfu for the day just din,
And my thanks for the lassie o the mornin.

And through the dusk we lingered wi nae words for us tae say,
Nae lang fareweel ‘twad brak the spell we’d baith mind aa oor days,
Just a friendly look, a kiss, a touch, we turned and walked away,
And noo ther’ll never be another mornin.