1: As I gaed up tae Alford for tae get a fee,
I met in wi Jimmy Broon, wi him I did agree.
 Come a hi come a doo, hi come a day,
Hi come a diddle come a dandy O.
2: I met in wi Jimmy Broon in the year o ninety-one,
Tae gang hame an caw his second pair an be his orraman.
3: When I gaed hame tae Guise o Tough 'twas on an evening clear,
In aboot an orra hoose the gaffer did appear.
4: I'm the maister o the place, that's the mistress there,
Ye'll get plenty cheese an breid an plenty mair tae spare.
5: Weel I sat an ate at cheese an breid till they did roon me stare,
An then I thocht that it wis time tae ging an see my pair.
6: When I gaed tae the stable my pairie for tae view,
Oh fegs! they were a dandy pair a chestnut and a blue.
7: On the followin mornin I gaed tae the ploo,
But lang, lang ower lowsin time my pairie gart me rue.
8: The ploo she wisna workin weel she widna throw the fur,
The gaffer says a better yin at the smiddy tae gang for.
9: When I got hame the new ploo she pleased me unco weel,
I thought she wid be better gin she had a cuttin wheel.
10: I wrocht awa a month or twa wi unco little clatter,
Till I played up some nasty tricks and broke a tattie chapper.
11: The gaffer he got word o this and orders did lay doon,
If I did the like again he'd pit me fae the toun.
12: We hae a gallant baillie, Wallace is his name,
He can fair redd up the kye when he taks doon a kame.
13: We hae a little baillie, Jamieson's his name,
He's gane ower tae Alford where he's raised an awfa faem.
14: He's gane doun tae Charlie Watt's for tae hae a dram,
Lang, lang e'er I gaed doon the laddie coulnae stan.
15: We hae a gallant kitchie lass, Simpson is her name,
For tae tell her pedigree I really would think shame.
16: She dresses up on Sunday wi her heid up off the level,
Twa are of ivory wad scare the very devil.
17: Noo ma song is ended, I won't sing any more,
If ony be offended I'll walk right ootside the door.
Come a hi come a doo, hi come a day,
Hi come a diddle come a dandy O.
|
|
|