1: Three gypsies cam tae oor haa door,
And oh they sang sae bonnie O;
They sang sae sweet and too complete,
They stole the hert o a lady O.
2: As she cam trippin doun the stairs,
Her maidens twa afore her O;
They took one look at her weel-faured face,
And they cuist their spells oot ower her O.
3: When her guid lord cam hame that nicht,
He wis askin for his lady O;
And the answer the servants gien til him,
"She's awa wi the gypsy laddies O."
4: "Gae saiddle tae me my bonnie, bonnie black,
The broun wis ne'er sae speedy O;
That I maun go ridin this lang simmer's day,
In search o my true lady O."
5: And he rade east and he rade west,
And he rade through Strathbogie O;
And there he met a gey aul man,
Wha wis comin doun through Strathbogie O.
6: "Have ye rade east, have ye rade west,
An have ye rade through Strathbogie O?
An have ye seen a bonnie lady,
She wis follaein the gypsy laddies O?"
|
|
7: "Oh I've rade east an I've rade west,
An I've rade through Strathbogie O;
An the bonniest lady that ever I saw,
She wis follaein the gypsy laddies O?"
8: "Last nicht I slept in a fine feather bed,
Wi ma ain wedded lord aside me O;
This nicht I maun lie on a cauld barn flair,
Wi the gypsies lyin aroon me O."
9: "Oh wad ye gie up yer hooses an your land,
And wad ye gie up yer babbie O?
And wad ye gie up yer ain wedded lord,
And keep follaein the gypsy laddies O?"
10: "Oh I'd gie up ma hooses an ma land,
And I'd gie up ma babbie O;
And I'd gie up ma ain wedded lord,
And keep follaein the gypsy laddies O?"
11: "Oh there are seiven brithers o us aa,
And we are wondrous bonnie O;
But this verra nicht we aa shall be hanged,
For the stealin o the earl's lady O."
|
|