1: Oh but the hours rin fast awa, like the Kelvin tae the Clyde,
Sin on its bonnie gowan banks I wooed thee for my bride;
My ain dear love, sae sweet an young, sae artless and sae fair,
Then love was aa the grief we kent, and you my only care.
Chorus:
Time wears awa, time wears awa,
And winna let us be;
It stole the wild rose frae my cheek,
And the blythe blink frae your ee.
2: When woods were green an flooers fair and ye were aa my ain,
I little thocht what years would bring o poortith, toil an pain;
Some wayfu hours hae flapped their wings, dark shadows ower oor lot,
Sin like twa cushats o the glen, we strayed in this dear spot.
3: The voices o these happy days steal on oor dreams by nicht,
An cherished memories rise and glow wi their depairted licht;
But still the birds and burnies sing their wildered melodies,
As in the gowden dawn o life when we were young and free.
Chorus:
Time wears awa, time wears awa,
And winna let us be;
It stole the wild rose frae my cheek,
And the blythe blink frae your ee.
|